Ekið sem leið liggur áleiðis eftir veginum til Krísuvíkur en síðan beygt af honum til vinstri inn á Bláfjallaveginn. Honum fylgt þar til komið er að neyðarskýli fyrir neðan Grindarskörð, þar sem gangan hefst.
Byrjað er á því að fylgja Selvogsgötunni upp í Grindarskörðin. Á leiðinni má víða sjá marka fyrir götunni í hrauninu. Full ástæða er einnig til að gefa gaum því sem í hrauninu leynist t.d. hrauntröðum, niðurföllum. Þegar komið er upp í Grindarskörðin blasir sléttlendið við sem Selvogsgata liggur yfir áleiðs niður í Selvog. Í Grindaskörðum eru eldvörp á alla vegu. Úr Miðbollum hafa runnið hraun eftir landnám og náð í sjó fram milli Straumsvíkur og Hvaleyrarholts.
Úr Grindarskörðum er haldið til vesturs upp nokkurn slakka og kemur þá í ljós að framundan er misgengi sem liggur nokkuð í göngustefnu og er því fylgt áleiðs. Brátt verður á vegi okkar fallega mótaður gjallgígur sem hefur hlotið nafnið Gráfeldur. Gaman er að fara upp á hann og skoða, enda er hann mjög reglulegur að lögun. Frá Gráfeldi er haldið áfram og sveigt örlítið meira til vesturs og tekin örlítil hækkun. Land fer nú að verða eldbrunnið og framundan rís Kistufell 527 m.y.s. Í Kistufelli er gríðarlega stór og mikill gígur eða jarðfall sem nýtur sín hvað best ef farið er upp á fjallið. Væntanlega er þessi gígur eitt af stærstu náttúrufyrirbærunum í nágrenni höfuðborgarsvæðisins en hann er um 300 * 400 metrar í þvermál. Ef tími vinnst til er áhugavert að ganga enn frekar í suðvestur og með goshryggnum sem þar er, en þar rís hæst Eldborg (515 m.y.s). Á sínum tíma hefur mikil eldvirkni verið þarna og hraun runnið til suðurs niður að Kleifarvatni og svo til suðaustur niður í Herdísarvík og í sjó fram.
Eftir að hafa staldrað við á þessu svæði er tímabært að snúa til baka og liggur þá leiðin niður slakkann undir Kistufelli og í Brennisteinsnámurnar. Þarna var unninn brennisteinn handa kónginum á sínum tíma. Ekki þótti þetta vera mjög arðbær framleiðsla, enda um langan veg að fara og lagðist hún því af eftir skamman tíma. Frekari upplýsingar um brennisteinsnámurnar má finna hér. Eftir að hafa staldrað við í brennisteinsnáminu er haldið til norðausturs milli hrauns og hlíða alveg fram í Grindarskörðin og þangað sem gangan hófst.
Brennisteinsfjöll eru í einum af fjórum megin eldstöðvakerfum á Reykjanesi og er það kennt við fjöllin. Nær það allt frá Krísuvíkurbjargi í suðvestri og inn á Mosfellsheiðina í norðaustri. Virknimiðjan í kerfinu er hins vegar í kringum Brennisteinsfjöllin og að Bláfjöllunum, en hvað mest eldvirkni hefur verið í Brennisteinsfjöllunum sjálfum. Eldborg undir Geitahlíð og Eldborgir í Leitarhrauni marka syðri og nyrðri mörk eldstöðva í kerfinu. Síðast er vitað til þess að gosið hafi í Brennisteinsfjöllum laust eftir landnám.
Göngufæri er almennt nokkuð gott. Nokkur hækkun er upp í Grindarskörðin en eftir það er yfir slétt hraun, móa og mela að fara.

Sérkort - Suðvesturland, 1:75000, Landmælingar Íslands.
Kortadiskur 3, Landmælingar Íslands.
Kortadiskur 4, Landmælingar Íslands.
Árbók FÍ 1984, Reykjanesskagi vestan Selvogsgötu, FÍ 1984
Íslenskar eldstöðvar, Ari Trausti Guðmundsson
http://www.ferlir.is/?id=3491